Бүгінде Абай атындағы Қазақ ұлттық педагогикалық университеті - «Педагогикалық ғылымдар», «Өнер және гуманитарлық ғылымдар», «Жаратылыстану ғылымдары», «Қоғамдық ғылымдар», «Бизнес, менеджмент және құқық» және т. б. кадрларды даярлау бағыттары бойынша жоғары және жоғары оқу орнынан кейінгі білім беру саласындағы ірі ғылыми-білім беру орталығы болып табылады. Университетте білім беру бағыттары бойынша жеті институт жұмыс істейді. Олар: Педагогика және психология; Математика, физика және информатика; Филология; Өнер, мәдениет және спорт; Жаратылыстану және география; Тарих және құқық; Сорбонна-Қазақстан институттары.

800 жылдан астам тарихы бар Сорбонна-Париж сити университетінің филиалы «Сорбонна-Қазақстан» институты ашылғаны университет өміріндегі елеулі оқиға болды. Университетте 34 кафедра бар, оның ішінде үш университет кафедрасы (Әскери кафедра, ЮНЕСКО-ның педагогика бөлімі, Қазақстан халқы Ассамблеясы кафедрасы) бар. Университетте 15 диссертациялық кеңес, жас ғалымдар кеңесі, ғылыми кітапхана және «Ұлағат» баспасы бар. Жақында біліктілікті арттыру және қашықтықтан оқыту орталығы, «Шапағат» студенттерге цифрлық қызмет көрсету орталығы, Білімді ақпараттандыру мәселелері және білім технологиялары халықаралық ғылыми зертханасы құрылды.
 

Жалпы, университеттің білім беру қызметі орасан зор, үнемі жаңа міндеттер қойылып, шешіліп отырады. Сонымен қатар, Абай атындағы ҚазҰПУ-да оның даму тарихы да дәріптеліп келеді. Қасиетті қара шаңырақтың сан қилы тарихында университеттің қалыптасып, дамуына зор үлес қосқан, көргені мен түйгені мол тәжірибелі басшылар мен қоғам қайраткерлерінің алатын орны ерекше. Оқу орнында университеттің қалыптасуына өлшеусіз еңбек сіңірген Ахмет Байтұрсынұлы, Санжар Асфендияров, Ораз Жандосов, Сәкен Сейфуллин, Бәймен Алманов, Халел Досмұхамедов, Құдайберген Жұбанов, Ілияс Қабылов, Әлімхан Ермеков сынды арыстарымызға арнап ескерткіш тақта қойылған. Мұның бәрі келешек ұрпақтың кемел ұстыз болып қалыптасуына жарқын жол ашатын өнегелі тәрбие құралдары.

Талапкерлер қабылдау комиссиясына келесі құжаттарды тапсырады:

• университет ректорының атына өтініш;
• жеке куәліктің көшірмесі;
• орта білім туралы аттестат / қосымшасы бар орта арнаулы немесе жоғары білім дипломы (түпнұсқа);
• 063-нысанның көшірмесі (егу картасы);
• 086-У нысанындағы медициналық анықтама (флюорография суреті);
• 3х4 фотосурет (6 дана);
• ҰБТ тапсыру қорытындысы бойынша нәтижелер;
• тіркеу куәлігінің көшірмесі (ұлдар үшін);
• шет тілінде жазылған құжаттар қазақ немесе орыс тілдеріне аударылып, нотариус куәландыруы тиіс;
• шетелдік азаматтардың құжаттары Ұлттық аккредиттеу орталығында нострификациялау рәсімінен өтуі тиіс (куәландырылуы тиіс).

Туындаған сұрақтар бойынша қабылдау комиссиясына телефон арқылы немесе әлеуметтік желілер арқылы хабарласыңыз.